حامد كعيد الجبوري
الثلاثاء 25/5/ 2010
حمامة بيت
حامد كعيد الجبوري
الى الصديق الراحل فاضل الربيعي
يعينك الله أشكد جنت ترسم أحلام
ويا حلم يوصل حقيقه ويبتعد
يعينك الله وكل كتر منك أهموم
شلت هم الناس وهمومك تصد
عفيه كلبك ما عرف يحمل الغيض
يا حمامة بيت ما تحمل حقد
من كثر ما تعشك وتهوى الزهور
صرت أشوفك نبعه وأشتمك ورد
وبالزغر نتراهن أنهد الطيور
ونفرح أبكد الفرح لمن ترد
رضعنه حب الخير من صدر العراق
ومن حليب العافيه أبنفس النهد
مره جيتك متعني كاصد الدار
تيهت بابك ودلاني العكد
إبساع ضيعنه الفرح (يابو وهب)
سوره عالي وكل كتر منه يسد
أبعكد (باني) (1) نركض العكد (البيات) (2)
نسأل البيبان وندور نشد
وين (فاضل) وين أحلام الزغار
ودع الخوان وأحبابه اليود
وين كتبك والسياسه والرفاق
وللحزب شريان بكليبك تشد
أمنحت عمرك من صدك يا بو (وهب)
سجلت تاريخ ودروبك سعد (3)
بحتفال الحزب أول بالحضور
تسمع أشعاري وتفرح من بعد
أبعينك أتأشر وأعرف ما تريد
مو لسانك كلبك أيكلي أعد
صاحبي ما تخلص أيام العجاف
أبير يوسف طحنه لا وارد يرد
يصيح يا بشراي ويذب الحبال
مو (زليخه) التشتري ! أنبعنه العبد
أعبرنه بير الظلم طحنه أبنص ظلام
أبهاويه ويا مكصد اللي ينكصد
صاحبي أخلد قريراً وأستراح
غيرنه الياكل وأحنه اللي نجد
(1)(2) أزقة ، طرق في محلة الوردية / الحلة الفيحاء
(3) نبات بري له رائحة ذكية مطيبة للأفواه