حامد كعيد الجبوري
الأربعاء 14/4/ 2010
صبر مفطوم
حامد كعيد الجبوري
لا تنصـب حـواجـز لا تخلـي أحدود
وبوجه اليحبك بابك أتسده
تمنيني أبوصــل وأتنطرك ملهـوف
وعلى أجروفـك شتلت أعيوني من مده
أخدودك ناغمنــي وترفــض العـينين
لاتــــرخــي الحــبـل ويــايَّ و تشــــده
مبحــر و السفـينــه أتضيــع السفـان
جــزره و الغــريــق أتشـلهه الـمَـده
فـراكـين المحطه وصاح بيها الريل
ويا ريل اليجيب العـُمــر ويـــرده
تـمــر وحشه الليالي و الكمر ذبلان
يتــوجـَـه اعلى حيلـه و الشمس رمده
وردة ناز عمـري للشمـس تضحــك
يحركـها الـوصـال وتــنــتِـظـر وده
احـســبــها عـدل تـتعـشَـه بـيه أتريـد
وآنــه مـن الـفــجر من ريجَك أتـغـده
أحــذرَك آنــه شاعر مُهرتي امنـتـغـير
تــُعبــر خـنـدقَــك والحصنــك أتهــده
***
صحــيت المـواجع غافيه أمن سنين
خليــــها أبصبــرها ونـايمــه ابـمــهده
حلمــان وصحـــه يتــوسـد الذرعان
يفـوج أبكيــش خِصرَك يسبَح أبنــهده
مفطوم و رجع يرضع حليب الشوك
بيك وجلَب المفطوم شيهده
أشــفافـَـك من حلاهن يستحي البرحي
عليــل ومــن حــلاتـَـه مايع الوحـده
عتــقــت الخــمر بشــفافــك أمتــانيـك
لو عابــد يضـــوكـَـه ايتيــه الرُشده
أشـــكـد شــايــل تــرافــه يا نبع بربين
يميل امن الطراوه ويـنكسر عضــده
يـاحبــة مـسج شـــب أبـكَـلـبـهـا النار
يــفــوِّح عــنـبــره وتــتســّيـد ابـخـده
نـــحــلان الــخصر شايل ظلم نهدين
مـثــني اعــلى الردف يتوسل إيسنده
أشـجم صايم فُـطر شايف إهلال العيد
إبــن ليلـَـه وظهــورَه من فَجر زنـده
أمن أخدودك إشفافي لسه رَيانات
منـهــن شـال غـيض وتستحي الزبده
إبمـحـرابـك صلاتي وأنـذرتـلـَك صوم
خـاشــع وأنــدعي لـهــلالَـك انـعـيـده
يــارب الــدلال أتـوازه وأكـفُـر بـيـك
وأتـخُـش أبــخـطيـتي و أعـلـن الـرده
أخــاف أرتــد وخـالف قبلــة الـعشاك
وتــمنـعـني الوصال و أنــحـرُم شهده
لا فـشلـه التكضــني لا بيـاض الراس
ولا عُـمري الجزَه الخمسين وتعده
زرعـنَــه أمـراشن وكــاع البجر متبور
ويّحــد منجـل شماته العاذل إيحصده
لم طاغــوت حسنــك لا أثـور أعليـك
ريّضهــا ابـــهـــداوه وعــايــلَك رده
نــحلــة عســل آنــه عــالورد تعتاش
وأنت أمن الجدم حد راسـك الــورده