كتابات أخرى للكاتب على موقع الناس

الأحد 9 /11/ 2008

مرثية الى كامل شياع شفافية القلم والقرطاس   حسين جهيد الحافظ ما أرثيك لأن طبع الرثاء اِيكون للميتين مثل طبع الحراره اِملازمه للصيف ولأن اِنته الشمس چذاب كلمن گال يوم اِتموت حته لو حچي بالطيف يا كيف الثقافه ومهرجان وعيد الثقافه تضمحل لو ما ريعت بالكيف يشفافية الچلمه ويا عمر طيبات يبو اِعيون اِبطبعه تنظر الباچر بعيونك أمل مرسوم حنيه وحلم شاعر يا جبر الخواطر شيمه تنبض بيك أبد مل ضاگ خلگك واِكسرت خاطر ما أرثيك لأن گبلي .... القصيدة والقلم والريشه والقرطاس رثنك بالصدگ واِگلوب كل الناس الألم يعصر ألم بيهه خبر موتك يابلبل حديقة بيتنه الغريد كل ظنهم يموت الزين واِبچيلة حقدهم سكتوا صوتك رغم يدرون يا صوتك قضيه بيه تغنه اِبشيلي نيرودا وعالجبل كوران أخذ منه قصيده وحمد شاله بندقيه وشالته اِصدور الخلگ أجمل هويه ردده النواب بالحب أغنيه وليلة الميلاد يتحزم هديه ما أرثيك لأن أدريك اِنته الموت وعلم ثوار .. بسمك خشبة التابوت ما أرثيك يكامل ما ينقصك شي كامل بالحچي .. بالسكته بالبسمات بسطور الكتب .. بالقلم بالقرطاس بأوراق الجرايد بالدرب المشيته واِنته واثق بيه وكل نگلة جدم تكتب قصايد قرير العين نام اِرتاح يالدربك دربنه والدرب واحد تعبد من دمه الطيبين فهد ومحمد وستار حازم والعبلي وصارم وخالد جمال الحيدري ووضاح لاگه الموت مثلك مبتسم صامد أولاد الشهاده يا كفو ونعمين ماجد أخذ عن ماجد ما أرثيك م ا أ ر ث ي ك لأن طبع الشمس معروف