كتابات أخرى للكاتب على موقع الناس

الأربعاء 9/11/ 2011

روحي أرجوچ حسين جهيد الحافظ   (بعد ما فات قطار العمر                             جاءت !!) روحي أرجوچ .. ما بياش حيل إيشيل سالوفة عشگ رمده ولا بيَّ خلگ يتحمل إشتردين الگلب باب العتب سده اليعاتب كون صاحب حگ مو خاين عشرته وناكل العهده تتذكرين ..! إمن إجيتچ أنزف إمن الشوگ طگ شوگ النزف شريان وإتعده گلتلچ بَيْ جرح مالوم بسمة شفتچ إتضمده شلتِ الخشم فوگ الفوگ چن الله غيرچ ما خلق وحده روحي أرجوچ ..! أبد ما ريد نگلة جدم وي عربيد كل ساع ونزع جلده ولا بيِّ أصيرن منجل إبچف مجنون عمداً يحصد الورده أنه إبنادم .... أحب الناس كل الناس أحب عين الشمس ضويات مو عين الشمس رمده أحب أنه التواضع والتسامح والوفه والطيب أموت إمن التعالي وأنتفض ضده طفل عندي العشگ وإرويحتي مهده مو مثلچ وكيحة عين عندچ بالعشچ غايات عشگچ مده إو مده عشگچ سگف من كارتون گبل وكت المطر نده إذن خل نفترگ ما دام كلمن غايته وقصده الناصرية / 11-11-2011