كتابات أخرى للكاتب على موقع الناس

الجمعة 6/6/ 2008

حلم آخر حسين جهيد الحافظ اِتحلمت بيك ولگيتك اِنته دنيه دنيه وكلش چبيره وشفت نظراتك قصيده ولافته وحب ومسيره يا ضمير الما رضه بالذل ضميره اِنته ديرم واِنته حنه وعيد واِحديثه وظفيره واِنته فيّ خيمة موده يربط اِگلوب البشر بالشوگ غيره اِشكثر ضدك سولفولي واِشكثر عنك حجولي چان كل ظنهم أعوفك والله حيره وسكته ردوا دوروني ما لگوا بس حبك اِنته باگكلب ما لگوا غيره بويه يابو اِعيون مرسوم الوفه بيهن محنه (اِشلون أوصف واِنته جنه) واِنته اِسمك فوگ حيطان الجوامع طابع الچفين حنه واِنته منجل شوگ تتناك السنابل اِنته جاگوك ويغني بيد عامل واِنته بدله ... بدله زرگه وعانگت تعب المعامل اِنته ناي ويطرب الحزنان صوته ورغم حزنه اِيطش مسره واِنته .. انته رايه اِمطرزه اِبحب الشعب واِتلوح حمره وسيف شگ ليل الظلام وطشه گمره واِنته سر اِشلون سر اِحتارت الأيّام بأمره اِحتاررررت الأيّام بأمررررره 6/5/2008