حسين جهيد الحافظ
الخميس 28/8/ 2008
خلگ ناطور
حسين جهيد الحافظ
يمر الليل بيّ اِمسامر الآه
ويمر بيّ النهار اِبتعب ناعور
مراني الفرح خطفه وجزاني وراح
وعاشرني الحزن أيّام وشهور
عليّ وكتي عواصف هبت وريح
وأنه ِاطويرة اِولايه وجنح مكسور
گلب سمچه الأحضنه اِببين الضلوع
تعلگ بالسراب اِبعمر منذور
على المامش بنيت آمال وآمال
وزرعت أحلام عمري اِبصبخه وبور
صيهود العشگ وأترجه خنياب
ومن رمل الصحاري أتنطر الهور
اِشكثر طبعي غشيم وصدگ مگرود
أريد الدفو والوادم اِجويريد
وأترجه النتانه اِتخضر اِبخور
بس خلگ چبير وحيل أثق بيه
لأن أدري اِبصراحه خلگ ناطور
تعود عالسهر واِمسامر الآه
من يوم التهحه الدار والدور
صبور اِشما تمر أيّام والدور
ولأن يدري الزمان أدوار والدور
يجي لازم وأعلم الگطع بيه
هذيچ الساعه...
...عود آنه اِويه ذاتي
ولو مجبور
أسامح والتسامح بيّ اِمن الساس
مجبول اِويه روحي وظلمتي نور
نذرت الروح للساروا وفه اِوياي
وسامحت الطغه واِتعامل اِبجور
ميهمني السفن لو صارن اِهواي
لأن طبعي وحياتك طبع الاِبحور
ولا اِيهمني الظلام اِشزاد ما زاد
لأن خلگي أعرفه خلگ ناطور
أدمن عالسهر واِمسامر الآه
وشتل عينه اِعله دربه وسيّرت نور
مشه طوله اِعله طوله
... وخوف الخوف
حط روحه ....
... اِعله چفه اِبشوگ شاجور
اِغتاضن اِعيونه وعافن النوم
وخذن ليل السهر حصه
.....اِبخلگ ناطورالناصرية
27/8/2008