حسين جهيد الحافظ
الأحد 27/3/ 2011
ثلاث قصائد قصيرة
حسين جهيد الحافظ
1 – اِشراع الوكت
اِشما طال ..
خلگ المصب للنهر
خلگ النبع أطول
واِشما كثر
حزن اليتيم وثگل
حزن الليالي أثگل
وطبع الجبل .. واِشما علا
ينهار لو ما الگاع
زهو السفينه .. الم
لو ما تشيل اِشراع
يشراع هذا الوكت
ووكت اليجي
والضاع
الكل باع كلشي وقبض !!
بس اِنته الما باع
اِنته الصدگ ما باع
2 – اِنته الصيح
غنّي على اِشفاف الجرح
واِتباهه لن اِنته الصبح
اِحضن اِطيوفك من تمر
كحله وجفن .. عيشة عمر
ترفات ضحكات الزغر
يالعشرتك طين وملح
غنّي على اِشفاف الجرح
سفّان كل شوگگ بحر
صلريك اِخيوط الگمر
راسم على اِضنونك نهر
شهگة هوه وگعدة صبح
غنّي على اِشفاف الجرح
يالعمرك اِبصبره اِحترگ
لوحة وفه اِشموع اِعتلگ
والحاسد اِبغيضه غرگ
شيمة بدو .. طبعك سمح
غنّي على اِشفاف الجرح
واِتباهه لن اِنته الصبح
3 - عين اليسار
عاين اِبعين اليسار
تلگه الدنيه نهار
والشمس تلگاهه شمس
اِتگطر وفه وحنيه
والليل ضويات وفرح گمريه
وتلگه الوطن غنوة عرس
وأطفالنه زفة ونس
شوگ الحزن چوبيه
دمع الفرح حريه
ينزف غوه
نجمه وضوه
تنثر هوه
والشمعه تمطر جلنار
إتعاين إبعين اليسار
نورهه إبنادم هويه
ترسم إعيونه قضيه
والوفه عدهه شعار
حلوه يا عين اليسار