حسين جهيد الحافظ
السبت 15/3/ 2008
مهرة حمدحسين جهيد الحافظ
ما يعثر جدمك ما يعثر
اِشما طال المشي اِشما طال ما يعثر
ولا تگصر خطوتك
يالخطوتك خطوه ما تگصر
اِشما صار التعب تابوت
اِشما بينه الوكت أوجر
چي لن الاِمعاند بيك سوله وعالألم تكبر
يا طبع الثيل يمتعب الحاصود
تتباهه المناجل بيك
بيك اِشما تحش تكثر
يا مهرة حمد وبساعة المركاض
تشگ الگاع ما تعثر
اِشما طال المسيراِبشوگ تتنهد
يلوح النجم من تصهل
رسنهه وللسمه تصعد
تشگ الليل من تجدح حوافرهه
ضوه وفوگ الگمر يمتد
تتغاوه النجوم اِبنظرة اعيونك
وأعواد المشانق للزلم تشهد
فخاتي الهور تعرف جيتك
والبردي والعگيد .. يعرف موش يتنشد
فرح واجبال كردستان ........
تعرفك كل قممهه وكل روابيهه
اِشكثر ضمدت بيهه اجروح
واِشگد غيرتك چانت تناجيهه
يالشايل عراق اِبكل عضو اِمن اِعضاك
سهل واِجبال ...وديان وبواديهه
حمامه وسبّگاتك طيف
واِبحب العراق اِبكيف تتبختر
ولا تعثر........
اِشما طال الطريق وطال ما تعثر
ولا تگصر خطوتك.....
يالخطوتك خطوه ما تگصر
ولا تعثر .....ولا تعثرررررررررر
آذار / 1985