حسين جهيد الحافظ
الأثنين 11/8/ 2008
ثلاث قصائد قصيرةحسين جهيد الحافظ
1 - سالوفة صعبة
اِشلون أسولف
والسوالف تجرح الساني وتتعبه
چنت أظنك ماي
لو طگني العطش بارد وأشربه
تالي لن اِنته العطش !
بويه اِشكثر صعبه !
2- سفرة وهم
فر بي ليل السهر واِشكثر بيه ألعاب
راواني ونسه اِشكثر واِشكثر شفت أطياب
لكن رغم هالفرح
طگ اِبضميري اِصواب
شالتني وحشة گبر وي النسيم الهاب
عاين عليّ صاحبي واِحتار بالأسباب
كلي اِشرايد بعد شو عينك اِعله الباب
والحزن ينگل حزن ...سن الضحك چذاب
گتله اِشتقت للأهل واللمة الأحباب
والچاي أمّي العصرللضحكه للأصحاب
الچانون ليل الشته وترتيلة المحراب
ولتراب ديرة هلي
الماشفت مثله اِتراب
هيهات مثله اِتراب
3 - سؤال عاشگ
لا تسأل لاتنشد عني
نايل آنه وماكو اِمغنّي
چوبي آنه ومامش كل دبكه
اِشرايد مني .. ؟
أحزان البيه أحزان الوادم
ما جادت واحد من حزني
اِونين الوادم كل الوادم وأكثر ونّي
اِشرايد مني
كاروك النومك سويته اِمرتب جفني
غنيتك حب وحنيه اِبأول لحني
اِشرايد مني ؟
اِشرايد مني ؟