حسين جهيد الحافظ
الأثنين 10/5/ 2010
شمعتان
حسين جهيد الحافظ
الشمعة الأولى ** ,,موناليزا ,,*
چانت نسمه
لكن أترف من كل نسمه
اِو چانت نجمه
اِتضوي أكثر من كل نجوه
اِو چانت چلمه
شالت كل أسرار الدنيه اِبهاي الچلمه
تلعب طفيره اِعله الموت
اِو محلاهه
شوگ الدنيه اِيطگ ويّاهه
وتغنيله اِبحس فيروز أعذب نغمه
موسيقة بتهوفن ضحكتهه
چلمة قديس اِو أكثر چلمتهه
اِبچفهه الترفه
اِتلاوت وي الطلقه اِبعفه
طگ الجبل اِبدمهه
بستان اِو حب هلهل سفحه
اِبريشة دافنشي اِنرسمت لوحه
بس يا لوحه .. لوحه اِعزيزه
او بسم الحب اِتسمت موناليزه
الشمعة الثانية ** ,,سحر بت الحزب ,,*وردة روز ..
النده .. يرتاح من يوصل شفايفهه
يحضنهه الگمر فرحان
النجم كل النجم يمشي ابطوارفهه
شربت من فرات الخير ماي
وشربت العفه
اِو زهت وردة محنه
اِو شوگ عالضفه
سجيه الطيب اِلهه والوفه عنوان
سحر بت الحزب
بت الأماني وردة الاِسكان
كفو أم محمد ونعمين
يغصن الزين
ما خضر أبد بس زين
نزف دمچ ( جدي )
واضح ضوه اِلكل عين
نزف دمچ سوط
خافوا منه جلادين
نزف دمچ كتب عالمشنقه
اِعله الموت
على اِزلوف الگمر.
.عالشمس للزينين
الحياة اِبذل مهانه
الموت بالعز شيمة الطيبين