حسن حاتم المذكور

ماجد فيلي .. يعاتب الوطن عاشقاً ...

حسن حاتم المذكور

استشهد ماجد فيلي على اثر انقلاب 08 / شباط / 1963 الفاشي ’ بالتحديد بعد صدور بيان الموت رقم ( 13 )
كانت اسباب تصفيته ثلاثية المنشأ .
1 ــ لكونه شيوعياً ...
2 ــ لكونه كردياً ...
3 ــ لكونه شيعياً ...
مع ان تلك الثلاثية نست انها كانت اسباباً لأجتثاث تلك الشريحة العراقية التي تميزت بجنون عشقها وعطائها للوطن .
عام 1980 وفي عملية انفال بشعة تم تهجير عائلته مع الآف العوائل التي تم اجتثاثها بعد ان عروهم من كل اسباب الحياة التي وفرها لهم ابائهم واجدادهم .
اخوته الثلاثة كانوا من بين الآف الشابات والشباب الذين تم اختطافهم وتغييبهم الى يومنا هذا.
لحظات يتفجر فيها الحزن عاصفاً في الصدر ’ ويبداء حصار الوحشة للقلب المذعور’ يرى الأنسان فيها ما لا يراه الأخرون .
شاهدت ماجد فيلي منتظراً على حدود الوطن خلف سياج عارشهادة الجنسية العراقية ماسكاً قطعة من الحزن الفيلي يتوسل ان يمسح فيها جروح العراق .
ــ ايها الوطن العزيز : نعترف اننا مصابين بحبك ... لماذا لا تعترف انت بأن حصاد ذلك الحب هو تاريخ مأساتنا ومعاناتنا ... ؟
ــ نبارك فتح ملفات جرائم النظام البعثي ... لماذا تتجاهل القومية والطائفية والعقائدية فتح ملفات بشاعة انفلتنا ’ الكونها مزروعة في انفلتك ... ؟
ــ لماذا يتخوفون ويتجنبون الأقتراب والنظر الى جرحنا .. الكونه مزروعاً فيك ... ؟
ــ لماذا يستعجلون اخفاء صفحة مآساتنا ... الكونها تنتمي الى تاريخ مآساتك ... ؟
ــ من خولهم ان يتصالحوا نيابة عنا ويفتحوا معهم صفحات بيضاء يمسحون بها اثار جرائــــــم انفلتنا ... ؟
ثم انفعل وارتفع عتابه صراخاً وغادر منكسراً تاركاً في ذاكرتي آخر الكلمات .
احبك موت ... وما اريدك ...
ما اريدك ... اريد انساك
ونسه كل عشرتي وياك
كتلت الصبح بعيوني
ودفنته بمكبرة ليلك
ما اريدك
فرح روحي على جفك طفل مذبوح
جفنته بسمل شينك
ما اريدك
حتى اسمي
امي الزرعت حروفه على شفتهه
نسيته هناك
بزبالة درابينك
ماريدك
اريد انساك
ولا فد يوم جنه احباب
ولا جني عشكتك يوم
ولا جني كلت لك يوم
روحي فدوه الروحك
اريد انساك يا الما تنسي
انساني
اريد انساك
وسدن كل سواكي الشوك
ولا خلي :
ولا شعرة محبه بيني وبينك
وظلن بيك ... احبك موت
انا مو خلك وركة عار
من زبالة التاريخ
انا دم ولحم منك
على شفاف النهر مزروع
ومثل صبر النخل صبري
لو جفت عطش دنياك
اصيرن لك سواكي دموع
وخضر بيك
وموتن بيك
جفن يلبسني ترابك
وسهر وي نشيش الماي
وعروك الزرع تتوسد ضلوعي
وحروفك مراود عيد
بفرحه تكحل جفوني
وتتوسد جنح روحي
ولوليلك
ولو ونيت
اكولن آخ من جرحك
كل هذا وصدك روح جذابه
لما تكدر على فركاك
وتكلي انساك
شلون انساك
ولك جرحي نفطم بهواك
وحبك موت ... وريدك موت
بوسة جرحي لجروحك
وريد انساك ... وما اكدر
جرحي نزرع بجروحك
ولا اكدر على فركاك
انا فيلي ......
اكولن آخ من جرحك
وظل مزروع بجروحك
وعطش شوك
وضوكنك وطن وشهك
عشك مجنون لعيونك
وحبك موت ... وريدك موت

23/08/2006