كتابات أخرى للكاتب على موقع الناس

الأثنين 12/5/ 2008

باقة دارميات من فراديس وروضة العراق ذياب مهدي آل غلآم أتمنه نجمة ليل وانزل عل أغطاك وبحجة البردان وتلفلف وياك ***** بالك تكول أحاه من دهرك آحاه جم ليله بيهه آيوب نام عله بلواه ***** ليش اليحب سهران طول الليالي كل ليله يظل حيران لأجل الغوالي ***** النجف ...... بلياك ماتسوه كلشي تضوي بسواد الليل من بيها تمشي ***** اسمع بنص الليل حس واحد يصيح كلما أفزن ليه لن دمعتي تطيح ***** أكطع وأجيك بليل وتعاتب وياك ملهوفه كلش حيل روحي عل ملكاك ***** الدهر بس وياي سواهه كلش اكعد بنص الليل وبراسي أملش ***** مر كلبي نص الليل سواهه هوسه منك حبيب الروح رايدله بوسه ***** معاتبي ويه الليل ومنادمي وياه كلب النساني شلون هم أكدر أنساه ***** مثل الكمر والليل آني وحبيبي حبه سكن بالروح دمر كليبي ***** بيده وتمعن بيج هذا الله سواج صفك الروحه حيل بكرسيه خلاج .....؟ ***** بين النهود أنظم حدر الكلاده شلي بصلاة وصوم هذي عباده ***** هم همي وهم الناس وهم الليالي ياهو اليصل لهواي يشكيله حالي ***** وحدج خلق بالكون ماسوه مثلج لاملك لاأنسان محد وصلج ***** عمي الله من سواك حط كيمر أعليك وملوحه مالت طين أبدن فلا بيك ***** بيده عجنهه وكال كوني صورتهه تبر وعسل مخلوط والجنه تربتهه ***** يكتل جمال البيك فنه اليلوحه حتى الله من سواك صفك الروحه .....؟ ***** طين وعسل مخلوط أشلون الله سواك للخمسه يعجن بيك لمن صرت صاك......؟ ***** كضبة دفو نهدج شمام وي التين سبحان من كوره وبيه التفنن زين ***** سبحان من سواك نص وجهك عيون زغير سبيت الناس من تكبر اشلون ***** أنت اول الحلوين متصدر الكل حتى المراره البيك هم حلوه تكتل ***** دورت كل الكون بس مالكيتك شايل جمال الحور أنهجم بيتك ***** يكتل جمال البيك جن شمعه بالبيت كل البشر من طين بس انته جكليت ....؟ ***** مانمت ربع الليل نشدوا المخده وآنه حلمت بهواي خدي عل خده ***** صافن واريد النوب كون أغفه وأنساك تاليهه صوره وصوت بالحلم الكاك ***** روحي بتوالي الليل تنشدني عنك كتلهه راح انساه كالتلي فنك ***** بالحلم شفتك طيف كحلت العيون نايم وافكر بيك من أكعد اشلون ***** شنهو الجمال البيك كيكه وعليهه شموع وك والله اخاف عليك من تضحك تموع .....؟ ***** مل مني حتى الليل والكمر شاهد بس بيك افكر دوم للفجر زاهد ***** ياكمر تالي الليل سمعني الاخبار نايم حبيب الروح لو مثلي محتار ***** سبحان من خلاك تنطيني ظهرك موجنت نص الليل صدري عل صدرك ***** أنهجم بيت الليل أشطوله بجفاك شو يمر مثل الطيف من أكعد وياك ***** متعني تالي الليل اشكي البلاوي شامه عله خدك هاي لو كمر ضاوي ***** الكمر يضوي بالليل والصبح غايب بس شامتك يفلان من العجايب ***** زلفه سواد الليل والشامه نجمه وعيونه عين الريم والشفه نعمه ***** ملبورن بلياك ماتسوه كلشي تضوي بسواد الليل من بيهه تمشي ....؟ ****** حي السعد / ملبورن المحروسة