كتابات أخرى للكاتب على موقع الناس

الأثنين 21/1/ 2013

بلسان أهلنّه ويكلك ليش تصفن.. وتضرب دالغات!؟ داود أمين حكومتنه الرشيده إحنه إنتخبناها شفنّه العكربه! وبيدينه شلناها! حيل ويانه كلها تكول، حقها الناس موصحنّه فطيسه! شلون أكلناها؟ حكومتنه الرشيدة إحنه إنتخبناها ! الصفنه وضرب الدالغات، صارت مثل المرض عدي، كبل هم جنت أصفن وأدولغ، بس بالسنه حسنه، إلا هسه كمت أطلع من صفنه، وما أشوف روحي إلا طاب بدالغه! وبيني وبينكم إستحيت أروح للطبيب.. شكلّه؟ أكله أضرب دالغات! هم خايف يكلي خاف عاشك لو تحب!؟ ويروح هم يتفلسف براسي، ويباوع من جوّ لجوّه لشيبات لحيتي، ويقرالي: (ترّه حب آخر عمر جتال)! عمي يا حب يا عشق!! علتي علة حكومة وصفنتي .. صفنة نظامْ إنذبح بالزردوم حلمي إنحبس بلساني الكلامْ يمنّه أتلفت وأباوع دنيه سوده وبس ظلامْ يسره أدير العين خايف كلشي ممنوع وحرامْ! يعني السالفه وما بيها.. هالصفنات والدالغات الزادت هالأيام.. هذا هو سببها، لأن مثل الما مصدك! مدري مصدوم! مدري مندهش! معقوله بعد صدام، ولسواه بشعبنه يجون ذوله الكاعدين هسه علكراسي!؟ ويعيدون ويزيدون على السواه صدام قاطات! ليش!؟ جاوينه حجيك ذاك وزماطك إلنه مو جنت أسمعك حيل تصرخ وطنّه بس ينقلع صدام .. إنكلبه جنّه ونفرش الكاع ورود، ونْفَرح أهلنه ومتشوف أبد جوعان يبقه بشعبنه ولا ظلم لا طغيان لا قسوة وإرهاب حرية بس للناس نفتحها الأبواب ولكم يا ورود هاي الفرشتوها!؟ ويا جوعان هذا الشبعتوه!؟ ويا حرية هاي الفكيتو بيبانها!؟ شو الزباله للركبه، وتارسه الشوارع والدرابين! من الموصل لأبعد محلة بالبصرة، والمجاديه بكل زويه، وبكل إشارة مرور، أكثر من ذوله الكاعدين لا يحلون ولا يربطون بلبرلمان! والحريه الوعدتو الناس بيها.. شافتها الناس بعيونها بمظاهرات ساحة التحرير بالسنه الفاتت! حريه مقلمه بالعصي والشتايم والخطف والتعذيب والكتل! حريه الشوارع والجسور السديتوها! .إوكلمن يتظاهر سويتو بعثي ومن جماعة صدامَ! حرية فزعتكم علنوادي الإجتماعية والثقافية وشارع المتنبي، وخصوصيات الناس، الحريه الوعدتو الناس بيها، صارت حرية البوك والنهب والتزويروشهادات سوك مريدي وسدلي هالفتحه إعله بختك وآنه أسدلك تالي فتحه أغرف أترجاك خلني بيه جوع إسنين ملحه أرد أعوض وأرد أسيرن على درب إبنج (يصبحه!) يلله شاركني الغنيمه لفحه إلي وهم إلك لفحه كل هذا الأشوفه وأعيشه يوميه، من طاح صدام لهسه، يعني من أزيد من تسع سنين .. ويجيك بطران ويكلك ليش تصفن وتدولغ!؟ إشلون ما أصفن وأدولغ والشعب ياكل حجارْ إشلون ما أصفن وأدولغ والوطن مشتعل نارْ زباله محتله الكراسي وتنهب بوضح النهارْ لا حسيب يكلها كافي ولا رقيب يصيح عارْ وناس هذا الوطن تلطم وتذكر ايام الحصارْ كهربا ولا ماي عدها ولقلق التموين طارْ مدري أشك الزيج وألطمْ مدري أهج بأول قطارْ مدري أعوف الناس تلهث وانتجي بصف الجدارْ حيل وياكم اصيحن إنتو كبرتو الزغارْ وباصابعكم العميّه عرّد بهالكرسي فار! اربيل - العراق