| الناس | المقالات | الثقافية | ذكريات | المكتبة | كتّاب الناس |
الثلاثاء 23 / 9 / 2014 العيداني مصطفى كتابات أخرى للكاتب على موقع الناس
موظف عسكري
العيداني مصطفى
لا بد لإرهاب داعش ومجرميه ان ينتهي في يوم ما فعلاً (بس شوكت محد يدري شلعوا كلوبنة) دخل العراق في دوامة معارك مع الإرهاب خلال العشر سنوات حيث حصد أجرام الإرهاب الى يومنا هذا الآلاف من الأبرياء لكن لا نعرف (ليش ما يندلون المنطقة الخضراء مثلاً .. زين افتهمنة تحصين امني بيهة (موت الله هم ماكو) شنو الفلم فهمنه يا عزرائيل (ع)) لكن بالمعارك الأخيرة مع داعش بانت الكثير من الوجوه التي تريد ان تمتطي (افهموهة عدل والله مو غلط) صهوة الجواد بأي طريقة كانت .
باتت البدلة العسكرية رمزاً لكل من يريد ان يزيد شعبيته (طبعا بواسطة اللوكية مالته) حيث المسؤول الذي يلتقط صورة له بالعسكري بالقرب من الثلاجة وكأنما الإرهابي (لابد بالفريز مالتهة) وذاك يوثق صور عسكرية (براس الشارع مالتهم) ويوهم الناس بأنه مشارك في (الحرب العالمية الأولى) والكثير من الصور (تفنن) بها السادة المسؤولين ليعطوا لنا صورة (جذابية) عن ولاءهم للوطن ..
ان من يريد ان يحارب الإرهاب فمن مكانه يستطيع ان يحارب القتل والأجرام وليس باللبس العسكري فقط يا سيادة الـ(.....) من خلال موقعك والمنصب (الي حضرتك فرحان بالكرسي مالته) يمكنك ان تقدم خدماتك للناس وتيسير امور الشعب وهذا يعتبر انجاز في خضم (الفوضى المؤسساتية) التي يعيشها العراق منذ 2003 كما يا سيادة (المسعول) (تكدر تساهم بفضح الفساد والمفسدين) هذا يعتبر بوجهة نظري المتواضعة من أعظم الجهاد كون دوائرنا باتت الصفة الغالبة بها هي (البوك والحرمنة) .
ونعود (لأبو العسكري وفرحان بالبسطال النظيف مالته) (زين الي يحارب عالا قل تتلف ملابسه شوي مو بعدهن جدد ) (المهم ما ندور وراهم خلونة بصلب الموضوع) يا سيادة المسؤول حضرة جنابك أمامك خيارين أما المشاركة في ساحات القتال وبارك الله بيك يا أما (تكعد بدائرتك وتسكت) (يعني ما صايرة عضو مجلس احد المحافظات الآمنة اكثر من شهر يداوم بالعسكري يتخيلك أنت كاعدة بوحدة عسكرية مو دائرة مدنية) .
علينا ان نفهم ماذا نفعل وبأي وقت نعمل حتى بالمحصلة النهائية نصل الى مبتغانا وهو خدمة البلد اما (تظل تلف وتدور ويومية منزلك صورة عالفيس بوك ) (صارت قديمة كلش) كوننا سئمنا هذه الأفعال التي تبعدنا عنكم وتصنع الفجوات (الفحطانة) (بيناتنة) .
*رباط السالفة : أعلنت وزارة الهشك بشك عن وصول العديد من البزات العسكرية على السادة المسؤولين التواجد الأسبوع المقبل في مقر الوزارة من اجل الكشخة بيهن قبل لا ينباعن ..!!