| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

عودة وهيب
aoda50@hotmail.com

 

 

 

الجمعة 9/1/ 2009



الدعثي

عودة وهيب
aoda50@hotmail.com


للحاج زعيبل ابن عم من الدرجة الثالثة اسمه يونس الحاج أدعيّر. يونس كان صبيا انطوائيا غريب الاطوار ، وكان ازعيبل يسميه ( اللئيم ) .
كان يونس رغم ان سنه لا تتجاوز الحادية عشر الا انه يحرص على التظاهر بالأيمان، فهو يرافق والده للصلاة في الجامع كي يستأنس بعبارات المديح التي تأتيه من المصلين ( بارك الله بيك يونس ) ( عفيه يونس ، الله يحفظك ويوفقك ) ( يونس وجهه منوّر من الصلاة ).
وكان الحاج دشر والد زعيبل يغار من يونس فيقوم بتوبيخ زعيبل: ( ولك يمته ايصير بيك خير ؟ شوف يونس ما يفوّت فرض، والناس كلهه تمدح بيه ) فيحتج زعيبل قائلا ( والعباس ، والعباس ، يونس يقشمر بيكم ، انا شايفه مية مره ايبول وهو واكف .. يوكف بين النخل ويتلفت، فاذا ما شاف احد، يبول وهو واكف ، وبرمضان ايسوي روحه صايم، وهو ياكل ويشرب ابسكته ).
وليس زعيبل وحده من يكره يونس فأغلب الصغار يتحاشون اللعب معه لأنه يثير الملل ، فهو اذا لعب (الدعبل) معهم يجعل من اللعبة ساحة للجدال الذي قد يتحول شجارا، وهو بطيء اللعب، لا يرمي ( الدعبلة ) الا بعد ( ان ياخذله صفنة طويله ) وكأنه صيّاد يريد ان لا يخطيء طريدته . كان يقف خلف ( الدعبله) ويطيل النظر فيها، ثم ينظر الى الدعابل المنتشرة في ساحة اللعب لكي يختار (الدعبلة) التي يروم ضربها بدعبلته ، ثم يقرفص ويعيد تفحص الدعابل، ثم ينبطح على الارض ويحاول ( من وضع الانبطاح ) اختبار الهدف ، ثم يقوم وينفض ثيابه من التراب ويجلس على ركبتيه ويضع اصابعه خلف الدعبله ، ثم يبعد اصبعيه عنها ليرجعها مرة اخرى، ويكرر ذلك عدة مرات فيصرخ به زعيبل : ( يله أيوينس فظهه مو ذبحتنه ..ولك هي دعبله ، قابل هي خطبة مره؟! ).
ومن عادة يونس ان يجلب كتابه المدرسي معه، فاذا شاهد قدوم احد المسنين ترك اللعب وتظاهر بالقراءة ، وفي مرات كثيرة يقوم زعيبل بتحريض الصغار على الأمساك بيونس واخراج (الدعابل) من جيبه لعرضها امام المسنين: ( شوفوا ، هاي الدعابل مالته، لايقشمركم بصلاته ). وكان يقول لمن يمدح يونس لعدم لعبه مع اقرانه: (بالعباس احنه ما نلاعبه لأنه يزغلط باللعب ).
وكان يونس اذا تكلم فانه يتكلم ببطء شديد، وكان يترك فواصل من الصمت بين كلماته (انا.. اعرف.. اسمه ...اسمه..) فيقاطعه زعيبل: ( ما تطلّع هلدرّه ، مو ذبحتنه)، فيرد يونس ببروده المعتاد :( أز..عيبل .. انت .. ليش.. محروكة ... خبزتك .. اذا مستعجل .. روح) .
وحين كان يونس في الصف السادس الابتدائي حاول الغش في درس التأريخ ، فوضع ورقة الغش وسط ورقة الامتحان وراح ينقل منها، فأحس به زعيبل وصار يتحنحن ، فخاف يونس من قيام زعيبل بفضحه، فأسرع الى اعطاء المعلم ورقة الامتحان، ولكنه لارتباكه قام بتسليم ورقة الغش الى المعلم بدلا من ورقة الامتحان ، فأشبعه المعلم ضربا وهو يقول له ( ولك غبي اكو واحد يغش بهاي الطريقة الغبيّه ) وارسله الى ادارة المدرسة التي استدعت والد يونس الذي قال للمدير ( لا استاد ، ابني ما يسويهه.. يونس عمره ماغش ، هاي سوالف زعيبل، دوم ايسوي بيونس دكّات ناقصة لانه يغار منه) ، وقد صدّق الحاج دشر(والد زعيبل ) رواية والد يونس فعنّف زعيبل وضربه، فازداد كره ازعيبل ليونس وألف ضده اهزوجة:
(غشاش وربعه ايعرفونه وبالصف يوميّه يهينونه)
وصار يستخدمها كلما اثار يونس مشكلة اثناء لعب ( الدعبل) .
وفي عام 1966 وعندما كان يونس في الصف الثاني ثانوي- الفرع العلمي انتمى الى الحزب ( الفاطمي) والقي القبض عليه بعد سنة، غير انه اطلق سراحه في نفس اليوم بعد ان دفع والده 500 دينار الى مدير الامن .
أخذ يونس يتفاخرأمام ابناء العشيرة بحادثة اعتقاله وراح يقص عليهم قصة صموده (رغم التعذيب القاسي الذي تعرض له ) في مديرية الأمن: ( ضربوني... راشدي ص.. مداني .. قسما ب.. ذات الله.. لحد الان اكو.. و..نّه باذني ) . غير ان زعيبل يروي حادثة اعتقال يونس بطريقة ثانية: ( بالعباس محد ضربه ،لأن ابوه ما تركه ولا لحظة .. اخذ شيخ العشيره ( صديق مدير الامن) وانطوا رشوه 500 دينار وسدّوا القضيه ،تعلموني بيونس!! والعباس لو بس لاوين اذنه جافلت الموجود وانطلق لسانه).
بعد انقلاب 17 تموز عام 1968 بأشهر قليله انظم يونس، الذي كان طالبا في كلية الهندسة ، الى حزب البعث بعد ان خوّفه ابن عمه البعثي من عواقب انتمائه السابق: (قضية انتماءك السابق للحزب الفاطمي محد ناسيهه، انا بعثي واعرف البعثيين ، لازم يجي يوم يعتقلونك حتى لو همّه يعرفون بأنك مبطل من الفاطميين ،انتمي لحزب البعث وخلّص روحك).
ولكي يثبت ولاءه لحزب البعث اصبح ملكيا اكثر من الملك ، فجريدة الثورة لا تفارقه ابدا ، وهو اول من يحضر الاجتماع وآخر من يغادره ، ولا يتوانى عن كتابة التقارير ضد اقرب اقربائه واصدقائه .
كان زعيبل موضوعا لاغلب تقارير الرفيق يونس، وكان يونس يحاول بأستمرار تحريض الفرقة الحزبية ضد زعيبل: ( زعيبل .. اكبر.. معادي للحزب.. والثورة ) ( اجتماعات الشيو..عين.. كلهه.. ابيت.. أز..عيبل )
(أ ز..عيبل.. مستغل الجبهه الوطنية لضم.. اقاربنه العسكريين للحزب.. الشيوعي ).
وحين اطلق الأمن سراح زعيبل بعد اعتقاله لمدة ساعتين بعد سقوط الجبهه امتعض عضو الفرقة يونس وقال في اجتماع الفرقة ( أنا ما افهم ..اشلون الأمن .. يطلقون سراح أز..عيبل وهو شيوعي خطر ) عندها رد عليه مسؤول الفرقة ( اخي ما تكلي انت ليش بالي زعيبل بلوة ؟ اصلا طلع ما اله علاقة بالحزب الشيوعي، وكل تقاريرك كيديه ، واذا عندك خلاف عائلي وي زعيبل فحلّه خارج الحزب ) . غير انه ورغم توقفه عن كتابة التقارير ضد زعيبل الا انه واصل التشهير به بمناسبة او بدون مناسبه ، فمثلا عندما تحدث أي مشاجرة في المدينه يعلق الرفيق يونس قائلا :
( أي.. ذوله ....جماعة..أز..عيبل..الشيو..عيين .. أيسكرون.. أوبعدين ..يتعاركون ).
ومرة زار المدرسة التي يدرس فيها ولده ميثم فقال للمدرسين ( ياجماعة.. آنه.. يمكن.. سكرت.. لان.. كنت.. راكب ..بالباص ..مال المصلحة.. وجان واحد.. من ربع.. أز..عيبل.. حلكه يفوّح عرك ،.. الريحه مالت العرك.. اجت ..عليه.. فراسا اسكرت.. وهسه راسي ثايل ). وكان احد المدرسين صديقا لزعيبل فقال له ( ابو ميثم ما راح تصحه الا اذا كسرت الخمرية ببطل بيره) .
في المقابل فان زعيبل لا يترك اية مناسبة دون ان يشوه سمعة الرفيق يونس واشاع بين الناس بأن يونس (مو بس بعثي ، يونس وكيل أمن ويروح للجامع حتى يكتب تقارير على اللي يصلّون )، (يونس يكعد بالنادي والجماعة ايشربون عرك وبيرة وهو يلغف بالمزة مثل الملهوك ، ومرة جانت المزّه زيتون ، فيونس صار يلغف بالزيتون ، الرفيق ابو رمزي كاله : رفيق يونس على كيفك، اكل وحده وحدة . لكن يونس سوّا نفسه ما يسمع وزيّد اللغف، فكالّه الرفيق ابو رمزي : كلنالك وحده وحدة سويتهه وحدة وحريه واشتراكية !!).
وكل مرة يتعرّض فيها بيت زعيبل للتفتيش ( بدعوى متاجرته بالسلاح) كان زعيبل يتهم ابن عمه يونس بكتابة تقارير ضده ، وحاول زعيبل ان يشكو يونس عند اعمامه فقالوا له ( بوية لا تورطنه وي الحزب ، هذا يونس بس انعاتبه ايروح يخبّر الفرقة ، وتعال ياعمي شايلني )
وفي عام 1980 واثناء الحملة الامنية ضد حزب ( الدعوة) صدر قرار من ( مجلس قيادة الثورة) ينص على اعدام المنتمين الى حزب (الدعوة) وبأثر رجعي فتم اعتقال عضو الفرقة المهندس ( يونس أدعيّر) بتهمة اخفاء معلومات عن الأجهزة الأمنية ( مشيرين بذلك الى عدم كتابته تقرير عن انتمائه السابق للحزب الفاطمي.) ومع كثرة (الواسطات) حكم عليه بسبع سنين وطرد من الحزب .
وعندما خرج من السجن لم يذهب زعيبل للسلام عليه ، وعندما التقيا مصادفة عاتبه يونس بتمسكن ( ليش.. خويه خالد.. ما تجي اتسلم عليه ؟ مو.. انت ابن عمي) فقال له زعيبل: ( هسه من طكوك بوري صرت ابن عمك ).
أستغل زعيبل طرد يونس من الحزب وصار يسميه ( بالدعثي) وصار يردد كلما شاهد يونس:
( أيوينس دعثي ،لاهو دعوة ولاهو بعثي ).
رحل المهندس يونس الى مدينة الثورة في بغداد عام 1988 فنساه زعيبل ولم يتابع اخباره ولم يتذكره الا في عام 2005 عندما شاهد في التلفزيون شيخا يصرخ ضد ( الأحتلال ) ، فالتفت الحاج زعيبل الى جُلاسه قائلا : ( ولكم هذا الشيخ اللي يصرّخ مو جنّه يشبه يونس حجي ادعيّر).أزاح (رحيّم ابو النفط) كاس الخمر عن فمه وقال: ( شنو يشبهه ؟ هو الشيخ يونس نفسه ، شنو ما تعرف ابن عمّك.. هذا الجماعة ابمدينة الصدر ايسمونه الخنّاك ، كلهه اتخاف منّه ، ربعة من يلزمون واحد ما يستخدمون لا الدريل ولا السچين ، شغلهم خنك. ويكولون : شيخ يونس هو اللي الّف كتاب :( قصة الخنق) .
فصاح حاج ازعيبل ( صدك جذب ) فتابع رحيّم ابو النفط :(نعم ، صدك . آنه من رحت لخوالي بمدينة الصدر، سمعت الناس كلهه اتسولف عنّه . خوالي كالولي روح سلم على (الخنّاك) بلكي يعينك بمكان زين، او على الاقل يعينك بحمايته .وفعلا لبست ثوبي الاسود وشدّيت الوصله الخضره على راسي ورحت ليه .. بس شنو ؟ تقابل المالكي اسهلك !! يومين لازم سره ، ومن وصلت يمه، وحبيت ايده، وكتله : انا ابن شريّف السفّان، ما دارلي بال، ولا كأنه يعرفني ، وفوكاهه دفع ايدي دفع ..وقبل ما اكعد دخلوا الحماية وكالوا: يله شباب اطلعوا ابسرعة ، اجو وزراء يقابلون الشيخ . وطردونه طرده كشره ) فصاح زعيبل ( الله واكبر .. ولكم ولا صايره !!شنو بزر سالفة !!اشو بسنة 88 أيوينس الدعثي جان يمنه، فيمته درس (اجرومية) ويمته وصل ( للسطوح ) ويمته صار مجتهد..) فقاطعه ارحيّم: ( عمي يا مجتهد يا طركاعة ، ملايين اتصلي وراه ، ومن يصلي يكطعون عشر شوارع ) فقال زعيبل: ( زين ميخالف، هاي بلعناهه ، هواي مثله سووهه وصارت ، لكن اريد اسألكم : انتم أيوينس الدعثي ما تعرفونه ؟ مو جان من يحجي ايعلّج اتعلّج، مو جانت الجلمه ما تطلع منّه الا بألف ياعلي ، اشو هسه صاير( ادرنكه بيد كاولي) ، ما يتلاحك عليه من يحجي !! ما معقوله !! قابل ركّبله لسان احتياط ؟كولوا غيرهه ، خاف مو أيوينس الدعثي) فقال ارحيّم ابو النفط :( حجي ، اشكاعد تحجي ،جاغير هي السلطة اتنطّق الحجر).
جاء صوت زوجة الحاج زعيبل من المطبخ : (حجي ، التشريبه استوت ،اصب العشه لو بعد وقت ) فصاح بها :

( بويه هرثي هرثي              فاز بيهه الصار دعثي !!!! )

 

free web counter