كتابات أخرى للكاتب على موقع الناس

 

الخميس 1/1/ 2009

حاج زعيبل يؤسس قائمة انتخابية للفقراء عودة وهيب aoda50@hotmail.com لاحظ الحاج زعيبل ان الفقراء والمسحوقين ليس لهم مرشح حقيقي(يعني منهم وبيهم ) في انتخابات المحافظات القادمة .. فليس بين المرشحين ( عربنجي ) او بائع نفط او عامل مسطر او فلاح ( ايده مفركسه من المسحاه ). و( صرّح ) الحاج في مجلسه الخاص :( لاتكلّولي المرشح (عليوي الافنص) اصله عربنجي، والمرشح( عميّر بُدعه) اصله حمّال والمرشح (لافي ابو كذله) اصله كنّاس..ذوله انظموا للأحزاب، وطيّروا ،وصاروا مسؤولين مايتحاجون. العربنجي عليوي الافنص ، مثل ماتعرفون ، صار الاستاذ( علي عبد الحميد عبد الحكيم)،وشايلّه جنطه متروسه شهادات مال سوك مريدي، والحمّال (عميّر ابو بُدعه) صار( السيد عمار عبد المجيد ابو الفضل ) ،ويدّعي بانه حصل على الدكتوراه بالعلوم السياسية من هولنده، وهو ولاطكه بالهولندي ، والكنّاس( لافي ابو كذله) صار (الشيخ لافي محمود الزعفران )، هذا مانحجي عليه خاف يشوّر بينه ..عمي ، ذوله الله نفخ بخلقتهم وبعد ما ينحسبون علينه.احنه انريد مرشح كون بعده حمال، تازه، مو جان حمال ، انريد واحد بعده كنّاس ومكناسته بايده ،انشوفهه بعيونّه، مو افندي، قاط ورباط ، وما يركب اله مرسدس ، وحمايته ست ميه ، شنو يابه والله الأخ جان كناس، انريد عربنجي بعده عربنجي مو جان عربنجي ، احنه الجان ما يفيدنه ، اشفادنه ( الجان وجنت،وياما كعدنه ابدارك؟)، كلهه ( جانت) ونعرفهم حق المعرفة ،لكن ياهو من ذوله العربنجية اللي صاروا مسؤولين كبار بالدوله العوراقية كال خل اذكر جماعتي واشوف اشصار بحالهم ؟ بالعكس صار يستنكف منهم ، واذا كتله استاذ انت عربنجي، لو استاد انت حمّال،يزعل ويغتالك ، يودّيلك بطّه تعبرك لصوب الآخره ..لا بوية ، ذوله بعد ما يمثلون العربنجية والحماميل وعمال المسطر والفلاحين ، لازم انشوف النه صرفة ونخلي الفقراء يرشحون للانتخابات بنفسهم). تحرك الحاج زعيبل بين اوساط الفقراء يدعوهم الى مناصرة دعوته فوجد استعدادا كبيرا لدى الناس لتقبل فكرته خاصة بين الشباب الصدريين السابقين الذين جعلتهم ( حملة فرض القانون) يعودون الى اعمالهم ( الحرة) السابقة التي لا تدر عليهم ( باكيت جيكاير) في اليوم ، وكان بينهم الشاب ( رحيّم ابو النفط ) الذي اصبح الساعد الأيمن للحاج زعيبل. شكل الحاج زعيبل ( خلية أزمة ) لدفع مشروعه الى حيّز التطبيق، وعقد اربعة اجتماعات مطولة لبحث المعوقات. وفي الاجتماع الرابع ، وهو اجتماع موسّع حضره العشرات من ( البطّاله) ، قال الحاج زعيبل لجماعته ( هسّه ما ظل شي ما سولفنه بيه ،فكرتنه الناس كلهه اتأيدها، لكن المشكله احنه لازم انسوي حزب او تجمع حتى نقدّم باسم الحزب قائمة مال مرشحين) فصاح احد الحضور ( ياحجي، صار النه اسبوع بهاي السالفة ،ليش ما نسوي الحزب ونفظهه، شني هي مشكله ، اشو الديره انترست احزاب) فاجابه الحاج ( اول مشكله اتواجهنه هي مشكلة اختيار الاسم ، لحد الان كلمن ايجر بصفحه ) فصاح احد الحضور ( انه اكول احسن اسم هو اللي اقترحه ( قاسم ابو الغاز ) فاعترض عليه البعض وايده اخرون وساد هرج ومرج فامسك الحاج بيد( الهاون) وراح يضرب بها على(الهاون) فسكت الجميع فقال الحاج ( اللي موافق على هذا الأسم يرفع ايده ) ، فارتفعت في البداية ايد قليله ثم رفع الجميع ايديهم، فقال الحاج ازعيبل ( جا اذا انتم كلكم اموافقين ليش سويتوهه هوسه ؟ جنكم جماعة مجلس النواب، من يتناقشون يتعاركون بالمدس، وبعدين كلهم يرفعون اديهم ) فقال احدهم ( حجي ، اذا راسا انوافق راح تكول ذوله ما يفتهمون) فقال الحاج ( هسه المهم راح يكون اسم التجمع ( تجمّع شفط الشفّاطة ).. وتريدون الصدك هذا الاسم كلش يوالم اهدافنه ،جيس وسبيل .احنه انريد نشفط افلوس كل واحد شفط افلوس العوراقيين وانرجعهه للوادم) .فهزّ الجميع رؤسهم. بعد مشكلة ( اسم التجمع ) طرح الحاج ازعيبل مشكلة التمويل ( العويصة) فقال ( لفته ابو اللبلبي ) بانه زار ايران عدة مرات، وعنده عدة اصدقاء ايرانيين ( وانتم دبرولي الكروه، وانشاء الله ما ارجع خالي )، وقال ( محسن البنجرجي) بان له ابن عم يعمل في الامارات وسمع منه ان الأمارات العربية تدعم أي حزب عراقي يمد يده اليها (دبرولي فلوس الكارت، وانا باجر اخابر ابن عمي ، وانشاء الله يصير خير ) وعلا ضجيج النقاشات بين مؤيد ومعارض للمقترحات فاستخدم الحاج زعيبل( يدّة الهاون) ليسود الصمت فقال للحضور ( شوفوا ربعنه . كلشي سولفوا بيه الا سالفة انمد ايدنه لدولة من الدول ، هسه اتكولون كلهه الاحزاب تاخذ من الدول . اكلكم ذوله شفّاطة ، واحنه ضد الشفّاطه ..دورونّه غير سالفة) فوقف ( رحيّم ابو النفط ) وصاح: (لكيتهه ابو جعفر. ماكو غير زرف الصدريين ..) فقاطعه حاج ازعيبل ( هاولك ارحيّم ، شنهي هاي السالفه الفاينه ؟ شنو زرف الصدريين ) فقال رحيّم ( ابو جعفر انت وين رحت، انا احجي عن زرف النفط .. كل حزب مسويله زرف بانبوب النفط ويسحب منه نفط ويبيع ، وكل الأحزاب لازمه سره على الانبوب ، كل حزب اله يوم واله كميه حسب قوة الحزب ، واكبر زرف هو زرف الصدريين ، بعده يجي لو زرف الفضيله لو زرف المجلس، وهاي الزروف محد يندلهه غيري ،آنه جنت يوميه أبحوش بيهه ، انا جنت ادلّي الشاحنات، واعرف يمته يجي البنزين ويمته يجي الديزل ويمته يجي النفط ، وجماعة المنشآت النفطية كلهم بالجيب. هز حاج ازعيبل يده وقال :( صدك لو كالوا: ما خرّت الا وهي مزروفه )