كتابات أخرى للكاتب على موقع الناس

السبت 17/4/ 2010

دردشة مع والدتي (6) حول أوسمة الملك سعود .. وحكومة العراق المقبلة علي ألأسدي - البصرة   عادت الوالدة من السوق وهي تتمتم مع نفسها بغضب ، سألتها ما الخبر؟ فأردفت قائلة : شليلة وضايع راسهه ، كلشي ما افتهمنة من هالحكومة الجربة ، حرام الجان كالوا احجاية وطلعت صدك. من اشوكت صارت السعودية دهن ودبس ويالعراقيين ، أشو طول عمرهم يكفرون بينا ، ويدزون هالتفجيرات والانتحاريين ، وماكو ناسفة إذا مو السعوديين وراها ، أشو صبحنا الصبح والا الطالباني بالسعودية ، وبوس وحضن ويا الملك سعود ، وفوكاها قشمرة بكلادة ذهب ودزه ، على شنو يابه ، شنو المناسبة؟ والطلباني ما مصدك معلكهه بركبته ومتونس عليها ، ولا عبالك صاير شي. لعد وين راحت حوبة هالناس اللي انكتلت بواسطة هالانتحاريين السعوديين. أي لو آني والله ما آخذها ، لو تصير مو كلادة ، لو ذهب الدنيا ينطوني ما آخذها ، وشي يصير خلي يصير. روح يمة وشوف بالسوك ، الدنيه مقلوبة ، كل الناس تحجي ودردم ، كلهه تكول شلون يقبلها الطالباني ؟ أشو ليش من نوري المالكي راد يسافر للسعودية رفضوا زيارته ، شعجب يدعون هذا وذاك والمالكي ما يدعوه ، مو هو رئيس الوزراء ، المالكي أهم لو البرزاني ؟ تريد الصدك يمة ، ما جان لازم الطالباني يرضى بالزيارة ويروح الهم ، لأن هذا يعني ضربة للمالكي حتى تصيرعداوة بين العراقيين ، مو بس هذي ، همه ليل ونهار يكفرون بالشيعة بالفتاوي. مو كبل اسبوع قتلت الشرطة اثنين من الارهابية بكركوك ، وطلعوا سعوديين، منو دزهم علينا ، حتى يفجرون أولادنا ؟ شنو هيج دم العراقيين رخيص؟ جان استحى على روحه ، هاي مذلة مو تكريم ، وين صايرة هاي ؟ لو بس هاي جان مايخالف ، هانوبة دزوا عالبرزاني وهم انطو وسام ، أي هاي شيتخليله حتى اتطيب؟ هاي صارت مثل واحد يخش بعينك ويهجم بيتك ، ولا عبالك مسوي شي؟ مو جان لازم الملك السعودي قبل كلشي يمنع الارهابيين ، على الأقل يلزم جم واحد منهم ويحاكمهم ، حتى لو بالجذب ، ويصدر بيان يهدد باعدام أي واحد ارهابي يتوجه للعراق ، لو مسوي هيج ، جان بيهه وجه ، لكن هيج بدون أي إجراء وابوك على يرحمه؟ هاي ما تصير ولا تنعقل؛؛ هذا كله بجفة ، وجماعة الصدر والحكيم بجفة ، كلهم انتو شجابكم بالوسطية ، منو مصخم وجهكم وطلب منكم تروحون لهناك ، بالله هاي مو لعب جعاب ومزعطة ، خلونة مضحكة كدام العالم ، إي انتو والسعودين كجا مرحبا ، منو عاتب عليكم ، شنو رايحين تشكروهم على التكفير وقتل الناس؟ مو جان أشرف الهم يروحون للهجروهم من بيوتهم ويعتذرون منهم ويرجعوهم لبيوتهم ، ذاكم همة ما زالوا مشردين بالبراري والبلدان الغريبة؟ ياهو أحسن ، بالله بروح أبوك مو جان أشرف لهم لو رايحين لابناء بلدهم بدل هالمذلة ، يتلوكون الهاذا والذاك ، اليسوى والمايسوى ، لو بس أعرف على شنو رايحة هالقشامر للسعودية؟ صدك لو كالوا ، إذا ما تستحي سوي ما تريد ، مو هيج المثل لو لا يمة؟ بالله بروح أبوك ، كلي يمة ، شراح تحجي جماعة الصدر ويا السعوديين ، مو مسخرة ، شيحجون؟ انشالله يحجون على المهدي المنتظراللي يموتون من ايجيب اسمه بالطاري.أكلك يمة ، أخاف من كل عقلهم رايحين يطلبون من الملك تسليح جيش المهدي ، والله يابة كل شيي ايصير ، كامت كعدت ، عفية جيش لا يشبع من أسلحة ولا يمل من المصايب. وفوكاها السيد كاعد بقم وكلشي يسويه بالريموت كنترول ، هاي مو عجيبة ؟ وانته يا عمار ، شجابك على هالطلايب ، مودتسوي جبهة ومائدة مستديرة ، وتخطب هنا وهناك ، تشكيل الحكومة أهم لو تروح تبوس بلحية هذا وذاك؟ شي ما يخش بالعقل ، أي شلون السيد ديفكر، هذا اللي ما دا أفتهمه؟ أقلك يمة ، أني وأم عبد الصمد قررنا نكتب عريضة للمالكي. تساءلت : وماذا ستطلبون في العريضة؟ فأجابت : اقترحنا عليه وطلبنا من المالكي ، لو يرجع الفلوس اللي صرفه من ميزانية الحكومة على الانتخابات ، لو يدفع عليها فريضة الخمس والزكاة؟ لأن هذي أموال الشعب ، وحرام يصرفها على الدعاية لقائمة دولة القانون. كلناله لازم تطلع منها فريضة الخمس والزكاة وتنبني بيهه ملاجئ للأيتام والمشردين والعجزة ، وشوكت ما يدفع فريضة الخمس والزكاة تصير فلوس الدعاية حلالا بحول الله تعالى. وكلنا إذا أكو وزير من الوزراء هم تصرف بفلوس الحكومة لازم هو هم يدفع الفريضة حتى يبري ذمته بالدنيا ، أما في الآخرة فهذا مو شغلتنا ، مو هيج يمة بالاسلام ، حسب ما عرفت فلوس الحرام تصير حلال اذا تخمست وتزكت ، آني هيج أدري لو غلط أحجي ؟ واقترحنا على السيد المالكي أن يلغي أمانة العاصمة نهائيا ، لأن ما بيهه أي فائدة ، وجودها والماكو سوا ، بس كلنا أن تتوزع ميزانيتها على الفقره والعطالة اللي ما عدها مصدر رزق ، وخلي يشوفله لأمين العاصمة ولمجلس المحافظة غير شغلة لأن ذولة خزونه. واقترحنا على المالكي أن ما يعين وزير لوزارة الكهرباء بالحكومة الجديدة ، لأن ماكو إلهه داعي ، منا العشر سنين واكثر ما راح نحتاج وزير للكهرباء ، لأن الوزير الله يحفظه ما قصر ، من ما تعين لحد اليوم يوقع عقود مع الشركات العالمية ، وما خلا دولة ما وقع وياها عقد لو عقدين. الوزير وقع مع الشركات الصينية واليابانية والكورية والألمانية والأمريكية والايرانية والصومالية والاماراتية و الكويتية والقطرية واليمنية واللبنانية والأنغولية والتركية والقرغيزية والبنغلادشية ، والمحطات اللي راح تنبني بحوله تعالى ، راح تخلي الكهرباء بالعراق مثل الزبل ، بعد عليش وزير وطلايب ؟ وطلبنا من المالكي ، أن تتحول ميزانية وزارة الكهرباء لتوسيع مقابر أئمتنا العظام في النجف الأشرف وكربلاء والكاظمية والأعظمية والشيخ معروف والكيلاني وسامراء المقدسة ، حتى تكون قادرة على استيعاب الأعداد المتزايدة من الشهداء ضحايا الارهاب التكفيري ، واللي يزيد من الميزانية يحتفظ بيه المالكي للانتخابات الجاية ، إذا ألله سهل وطولنا عمره. واقترحنا على سيادته أيضا إلغاء وزارة الدفاع والجيش العراقي اقتصادا في التكاليف ، لأن مو معقولة دولة صغيرة مثل العراق عدها تلاث جيوش لو أربعة. الحمدلله عدنا جيش المهدي في الوسط والجنوب ، وماشالله عنده خوش ضباط وأسلحة هوايه أحسن من الجيش العراقي الحالي ، وإذا جيش المهدي وفيلق بدر صاروا كلب على كلب ويشتغلون سوا يصير عدنه أحسن جيش. وعدنه بالشمال جيش إقليم كردستان الموحد ، وما شاالله صارعنده أسلحة متطورة ، وعنده خبراء يكدر يحمي كل الشمال حتى لو انضمت كركوك والمناطق اللي يكولون عليهه متنازع عليها. وهاي الجيشين كافية ، واحد بالوسط والجنوب ، وواحد بالشمال ، بعد شنو محلة من الاعراب الجيش العراقي ، اللي ما عنده ولاطيارة نفاثة وحدة. وتريد الصدك يمة هيج جيش مسحسل ما يراد ، إسمه بالحصاد ومنجله مكسور. وعلى هيج طلبنا الغاء منصب وزير الدفاع ووزارة الدفاع لأن مصاريف زايدة ، وبعدين كل الدنيا ما تريد جيش عراقي عنده طيارات ودبابات ، لا اسرائيل تريد ، و لا ايران تريد ،وكاكه مسعود قالها بصراحة ، مانريد جيش مثل كبل ، لاعاب حلكه يمة ، حتى الحكومة والاكراد ينامون وراسهم بارد ، شكد ما يبقون بالحكم لا حد يكلهم ولا حد يحاجيهم ، لا انقلابات وطاك وطيك ولا هم يحزنون ، والشعب يدافع عن نفسه والله موجود ، قابل الله سبحانه وتعالى يجوز من أمة محمد ؟ واقترحنا آخر شي ، أن بعد ما تصير انتخابات بالعراق أبدا ، لأن شغلة الانتخابات ما فادت غير شركات الدعاية ، والشعب كلشي ما استفاد ، ولازم يخلوها مثل كبل ، حكومة وحدة ورئيس واحد ، سنة وشيعة وعرب واكراد فد حزام ، ولاهم يحزنون ، راسنا فارغ وكلشي يبقى على حطة أيدك لمن ما يفرجهه ربك ، ويجيب الامريكان أو غيرهم حتى يسقطون الموجود وايخلون واحد جديد ، والله أرحم الراحمين. ها يمة ، شنو رأيك ، خوش عريضة لو موخوش؟