كتابات أخرى للكاتب على موقع الناس

 

 

الخميس 14/2/ 2008

يوم عيد الحب ! أسامة عبد الكريم فتحت الباب الحوش مستقبلا (أم تسواهن) ,اخذت الزبيل من على رأسها . خلعت هي فوطتها بتأفأف و كَالت : فتريت كل صيديليات المحله وما لكيت الدوه والحكومة اتكول الأدوية متوفره... تجدوها عند باعة الارصفه !! فرغت ( أم تسواهن) الزبيل في حوض المغسله ..وفتحت حنفية الماء لغسل الخضراوات .. وصاحت : الله واكبر ماكو ماي ..شطلعت..صار لنه فوك الخمس سنوات .. ماكو كهرباء .. الاسعار مرتفعة .. شحة الادوية .. نفط ماكو ... كلشي ماكو.. ما اعرف وين تروح فلوس الحكومة .. يمكن مدهونه لو مضروبة جويريد !! أخذت (ام تسواهن) من يدها الى غرفة النوم : تعالي ..تعالى مو سبـيـتـيني ..بس اللطم والنوح تعالي شوفي . فتحت باب غرفة النوم شافت ام تسواهن مزهرية قرب الشباك, مملؤة بالورد الجوري قرمزي اللون ويحيط بها ورد الرازقي مع معايده لشهريار وشهرزاد للنحات محمد غني حكمت , ام تسواهن فكت حلكها وعيونه بتعجب..وكالت : غرفتنه صارت ريحته طيبه, نستني تعب اليوم .. بس اسألك مو هذا الورد سعره غالي لو جايب ورد جوري وبس. قلت: لا سويه ظلمه هي مرة بالسنه .. دكومي بدلي عازمج على مسكوف عالبو نواس ..خلينا شويه نغير جو من السياسية وحكومة المالكي والميلشيات و الماكو .. وبعدين الورد الرازقي راح ينام ويانه هليليه !! ونحن في الباص كَالت (ام تسواهن) : شوف .. شوف نصب الحرية ..الله شكد حلو..شوف الحصان الجامح شوف المرأة وطفلها حاضنته.. بس صاير وسخ شوف آثار الطلقات على الحايط .. أنهجم بيتهم لا يقدرون تراث الفن ولا يحترمون الفنان جواد سليم ..لو النصب ناصي جان صار فرهود من حرامية الحواسم ..ويروحون يسوون سيوف وينحرون الناس الابرياء... جا وين وزارة الثقافة .. نايمين لو بس حايرين باللطم !! قلت : شبيج اليوم بس تشكين من هذا وذاك .. فكي ياخه.. ادري بيج ديموقراطيه للجعب! ..بس اصير رئيس الجمهورية راح عينج وزيرة الثقافة ..وتغسلين نصب الحرية باسفنجه ويه صابون مال مواعين !!.. واكول دبرته ام تسواهن ..عفارم عليج.. واكول ..ام كريوه تبين بالعبره!!! دخلنا الى المطعم واتفقنا مسبقا هي التي ستختار السمجه, اشارت ام تسواهن بسبابة اصبعها على سمجه تسبح بالحوض , طلعها السماج ووزنها بالميزان وكَال: سبعة الاف وخمسمية دينار. أجابته ام تسواهن باستغراب : سعرك غالي يلهب جيبي. كَال السماج : يا اختي ..هذا سعرنه ..وبعدين السمج يتكاثر بموسم الشته و صيد السمج ممنوع من قبل الحكومة. كَالت ام تسواهن : هي وين الحكومة ..كلشي اسعاره مرتفعة ..وكلشي بيه فساد.. اذا السمجه راسه خايس محد يآكله.!! كَال السماج : اختي لا دخلينه بالسياسة ..مو شيب راسي محد يسمع مطاليبنه احنه اهل باعة السمج..ويكولون همه يتلاعبون بالاسعار ... والسمج يروح الى محافظات اخرى ..كون حركة الزوار قوية فيزيد الطلب على السمج فترتفع الاسعار. واحنه نكعد عالرنكات ....كليلي منو يحلها ..!!؟ كَالت ام تسواهن : حكومة المالكي كَال السماك : ياحكومه يابطيخ .. واحد يجر بالطول واحد بالعرض ..وهذا زعلان جيبه وراضي عالمود الموازنة 2008 ..!! والله يعلم. كَالت ام تسواهن : آني خايفه لا تصير بمجلس النواب مناوشات بالعكل والنعوله والقنادر والكلايـش !! قلت الى ( ام تسواهن ) بانفعال: هذا عشانه راح يصير زقوم !! ألتفت ام تسواهن عالسماج : عيني سماجنه ..ستو السمجه زيي عالعناد المحاصصة !!!